Millət vəkili Qənirə Paşayeva Bakı Slavyan Universitetində 31 mart - Azərbaycanlılara qarşı soyqırımın 100-cü ildönümü ilə bağlı tədbirdə çıxış edib.

ONN media xəbər verir ki, , tədbirdə 31 Mart faciəsi, ermənilərin həyata keçirdiyi bu dəhşətli soyqırım cinayəti ilə bağlı gənclərə geniş məlumatlar verən millət vəkili Q.Paşayeva bu tarixi faktların dünyaya daha geniş yayılmasında, erməni yalanlarına qarşı mübarizədə gəncləri fəal olmağa çağırıb.

Q.Paşayeva gəncləri həqiqətlərin dünyaya daha geniş yayılmasında sosial şəbəkələrin təqdim etdiyi imkanlardan geniş istifadə etməyə də dəvət edib. Millət vəkili bildirib ki, hansı peşənin sahibi olmasından asılı olmayaraq hər bir insan öz ölkəsinin və millətinin tarixini də dərindən bilməlidir.

Dövlətin, millətin inkişafının gənclərlə bağlı olduğunu söyləyən deputat qeyd edib ki, Azərbaycanın güclənməsi xalqımızın güclənməsi deməkdir. O, tələbələri universitetdə keyfiyyətli təhsil və xarici dilləri öyrənmək üçün universitetdə yaradılmış mühitdən lazımınca istifadə etməyə və xalqımız, dövlətimiz naminə gələcəkdə səmərəli fəaliyyət göstərmək üçün hazırlaşmağa səsləyib.

Q.Paşayeva tədbir çərçivəsində təqdim olunan tanınmış araşdırmaçı, alim Şəlalə Həsənovanın "İrsimizə atəş açmayın" sənədli filminin Azərbaycan həqiqətlərinin təbliğində əhəmiyyətini qeyd edib.

Tədbirin sonunda Q.Paşayeva tələbələri maraqlandıran sualları da cavablandırıb və tədbirdə iştirak edən müəllimlərlə də görüş və fikir mübadiləsi aparıb.