Bakı metrosunda problem yarandı

28-10-2024, 10:50

Metronun "Azadlıq prospekti" stansiyasında vaqon qapılarına baxış keçirilməsi zərurəti yaranıb.

Bu barədə Bakı Metropoliteni QSC-dən bildirilib.

Maşinist problem müəyyən etməsə də, təkrar baxış zərurətinə görə qatar "Memar Əcəmi" stansiyasına sərnişinsiz yola salınıb. Dərhal əvəzinə qatar verilib. Nəticədə "28 May" stansiyasına qədər intervaldan əlavə 5 dəqiqə yubanma yaranıb.

***

Bakı metrosunun işində problem hələ də davam edir. Hazırda metronun “İnşaatçılar” stansiyasında qatarın 7 dəqiqədən artıq müddətdir ki, hərəkət etmədiyi bildirilib.

Məsələ ilə bağlı açıqlama verən QSC-nin mətbuat xidmətinin rəhbəri Bəxtiyar Məmmədov qeyd edib ki, bunun 2 əsas səbəbi olur:

“İnterval pozulanda depodan çıxan qatar "Nərimanov"dan "Dərnəgül"ə və geri qayıdana qədər tənzimləmə aparılır. Həmin qatar xəttə daxil olanda arxadan gələn qatarın toqquşmaması üçün sistem onu yubadır. Bir qatar hər hansısa sahəni tərk edəndən sonra, sahədən asılı olaraq, 1 və ya 2 dəqiqə arxadakı qatar ora daxil ola bilmir. Sistem imkan vermir (təxminən işıqforun qırmızı işığı kimi). İkinci səbəb odur ki, artıq 1 qatar xətdən çıxdısa, sıxlıq artır və qatar stansiyalarda 20-30 saniyə dayanırsa, bunun üzərinə sıxlığa görə 10-15 saniyə əlavə olunur. Beləcə, interval problemi olmasa da, qrafikdə yubanma yaranır. Nəticədə, 20 dəqiqəlik yolu bəzən 30 dəqiqədən də çox vaxta qət edirsiniz. Yağış və yerüstü sahədən əlavə təsirlərin olub-olmamasını yalnız monitorinqdən sonra deyə bilərəm. Əsas səbəb, istənilən halda, metroda yaranmış problemdir”.

QSC rəsmisi eyni zamanda qeyd edib ki, "Nizami-İnşaatçılar" sahəsində qatar bir stansiyanı tərk etməsə, digərindən qatar hərəkətə başlamır:

"Bu təhlükəsizlik məsələsidir. Məsələn, "Elmlər Akademiyası"nda qatar stansiyanı tərk etməsə, "Nizami"dəki stansiyada gözləyir. Metronun belə mürəkkəb sahələrində sıxlıqda qapıların vaxtında bağlanmaması halları artır. Yəni bir qatarın xətdən çıxması ilə yaranmış sıxlığın bir az da artmasının neqativ təsirlərində belə nümunələr də əlavə rol oynayır. Məsələn, belə halda "Dərnəgül" elektrik deposu olsaydı, əlavə qatarın oradan çıxması problemin dərinləşməməsinə təsir göstərərdi. Deponun inşasının başa çatması da xətlərin ayrılması layihəsinin tərkib hissəsidir. Köklü problem iki xəttin bir depodan asılı olmasıdır".

ONN İnformasiya Agentliyi