Azərbaycan İlahiyyat İnstitutunda (Aİİ) növbəti sınaq dərsi keçirilib. İngilis dili fənnindən keçirilmiş demo dərsdə institutun rəhbərliyi və müəllim heyəti iştirak edib.

ONN media xəbər verir ki, Aİİ öz məqsədlərinə nail olmaq üçün kadrların seçiminə xüsusi diqqətlə yanaşır. Yeni kadrların işə qəbulunu komissiya həyata keçirir. Üç mərhələdə reallaşan seçimin ilk mərhələsində komissiyaya təqdim edilən CV-lər nəzərdən keçirilir, sonra bu mərhələdən keçənlər müsahibəyə dəvət olunurlar. Müsahibədən uğurla keçənlər sınaq (demo) dərsinə cəlb edilir. Sonda komissiya üzvlərinin və müəllimlərin iştirakı ilə işə qəbulla bağlı yekun qərarlar verilir.

Məlumat üçün bildirək ki,Azərbaycan İlahiyyat İnstitutu(Aİİ) Azərbaycan Respublikasının Prezidenti cənab İlham Əliyevin 9 fevral 2018-ci il tarixli sərəncamı ilə yaradılıb. İnstitutun yaradılmasının əsas məqsədi Azərbaycan xalqının tarixi ənənələrinə söykənən və dövlət siyasətinin məntiqi nəticəsi olan dini-mənəvi mühitin qorunub saxlanılmasını və inkişaf etdirilməsini, dini fəaliyyətin təşkili sahəsində yüksək ixtisaslı kadrların və mütəxəssislərin hazırlanmasını təmin etməkdən ibarətdir.