Sofiya artıq dünyada tanınmış süni intelekt nümayəndəsidir və onun səfər etdiyi ilk ölkələr içərisində Azərbaycanın da yer alması sevindiricidir.

ONN media Axar-a istinadla xəbər verir ki, bu sözləri millət vəkili Aydın Mirzəzadə deyib. Millət vəkilinin sözlərinə görə, Sofiyanı yaradan şirkət Azərbaycanı inkişaf edən bir ölkə olaraq dəyərləndirir:

"Sofiya Azərbaycanda süni intellektin inkişafı üçün baza olacaq bir mühit görür. Onun Azərbaycanda dövlət başçısına ASAN Xidmətlə bağlı informasiya verməsində gələcəyə bir çağırış var. ASAN Xidmət bu gün Azərbaycan brendlərindən biridir. Dünyada Azərbaycan təcrübəsini öyrənməyə böyük bir maraq var. Sofiyanın 2 gün ASAN Xidmətdə "könüllü" olması göstərir ki, gələcəkdə Azərbaycanda informasiya, kommunikasiya texnologiyalarının inkişafı istiqamətində çox böyük işlərin görülməsi planlaşdırılır".

Millət vəkili qeyd edib ki, Sofiyanın ilk olaraq Azərbaycanın paytaxtına deyil, İmişliyə gəlməsi də xüsusi bir mesajdır:

"Bununla da Azərbaycanın regionlarının yüksək inkişaf səviyyəsi dünyaya bir daha nümayiş olundu. Sofiya müxtəlif böyük həcmli beynəlxalq tədbirlərdə çıxışlar edir. Onun ölkəmizə növbəti səfəri gözlənilir. Hesab edirəm ki, Sofiyanın Azərbaycana indiki və gələcək səfəri sahibkarlar və elm adamları üçün yeni motivasiya mənbəyi rolunu oynayacaq".