Bu gün Beynəlxalq Mətbuat Mərkəzində (BMM) “Dünya Azərbaycanlılarının Mİlli Birliyi”nin sədri Cavad Derəxti mətbuat üçün konfrans keçirib.
Xarici ölkədə yaşayan və Azərbaycanı təmsil edən təşkilat nümayəndələrinin, media və ictimaiyyətin iştirakı ilə keçirilən tədbir aprel döyüşləri zamanı həlak olmuş və bütün şəhidlərin xatirəsi yad edilərək Azərbaycanın himni ilə başladı.
Konfransın təşkilatçısı, “Dünya Azərbaycanlılarının Milli Birliyi”nin həmtəsisçisi və Azərbaycan nümayəndəliyinin rəhbəri Xəzər Emin mətbuat konfransının əhəmiyyətindən danışaraq İsveçdən, İngiltərədən, Almaniyadan, Türkiyədən ,Rusiyadan, Gürcüstandan gələn qonaqları salamlayaraq konfrans iştirakçılarına təqdim edəndən sonra sözü "Dünya Azərbaycanlılarının Milli Birliyi"nin sədri Cavad Derəxtiyə verdi.
Cavad Derəxti öz çıxışında Avropada yaşayan hər bir Türk dilli xalqların birliyinə nail olmasından danışaraq bildirdi: “Hörmətli media mənsubları , özəliklə çox-çox uzaqlardan gələn dəyərli dostlar, sizinlə biz uzun illərdir çiyin-çiyinə dövlətçiliyimiz, milli birliyimiz uğurunda mübarizə aparırıq. İsveçin Malmo şəhərində qeydiyyatdan keçmiş “EuroAzTv” televizyası fəaliyyət göstərir. Bu televizya vaistəsi ilə Azərbaycanmızın hər zaman haqq işini dünyaya çatdırırıq. Bilirik ki, Avropada bir çox azərbaycanlıların təşkilatları fəaliyyət göstərir, burada həm iqtidar həm də müxalifət tərəfdarlarları var. Hərdən bu təşkilatlar bizi mitinqlərə sürükləyirlər , amma biz müstəqil təşkilat, müstəqil insan olduğumuzdan heç bir mitinqlərə qoşulmur umumi Azərbaycan uğurunda öz işlərmizlə məşquluq.
Bizim bura gəlməkdə məqsədimiz 31 mart azərbaycanlıların soyqrmı ilə bağlıdır. Hansı ki, 100 il bundan əvvəl Azərbaycanın həm qüzeyində, həm də güneyində ermənilər birləşərək soyqrım törətmişdirlər. Azərbaycanın güneyində Xoy , Urmuyə, Köhnə Şəhər və başqa şəhərlərdə soyqrım törədiblər . Bu vaxta qədər Cənubi Azərbaycanda bu haqda cəmi bir kitab işıq üzü görüb, bu soyqrım haqqında heç bir ətraflı məlumat verilməyib.
Biz bu qonaqlarla “Quba soyqrmı” abidəsini ziyarət edərək orada ermənilərin törətdiyi vəhşiliyi lentə alaraq Avropada aparıcı televizyalar vaistəsi ilə avropalılara çatıracağıq.
Bu konfransada iştirak edən mənim oğlum Siyavuş Derəxti və iştirak etməyən Siyamək Derəxti Avropada doğulub yaşamalarına baxmayaraq ürəkləri azərbaycanlılarla döyünür. Bu Siyavuşun Azərbaycana dördüncü səfəridir, hər gələndə özü ilə İsveçdən jurnalistlər, iş adamları gətirərək Azərbaycanla tanış edir və bu bizim üçün çox önəmli gəzinti olur, çünki hər dəfə bura gəlib gedəndə xarici vətandaş öz təəssüratını öz dostları ilə bölüşürlər. Siyavuş bəyin məqsədi 2018-ci ilin oktyabr ayında öz hesabına 20 nəfər tələbə uşaqları Azərbaycana gətirməsi və onları Azərbaycanın tarixi, görməli yerləri ilə tanış etməkdir.”
Daha sonra çıxış edən Dünya Azərbaycanlıları Assambleyasının prezidenti Rəşad Quliyev qeyd edib ki, Azərbaycanı beynəlxalq səviyyədə təmsil edən bir neçə təşkilat var: “Onlardan ikisi son illər Avropada fəallığı ilə seçilən Dünya Azərbaycanlıları Milli Birliyi və Dünya Azərbaycanlıları Assambleyası təşkilatlarıdır. Məlumdur ki, biz iki təşkilat birlik qərarı almışıq. Dünya Azərbaycanlıları Assambleyası beynəlxalq və ictimai təşkilat olaraq Almaniyada qeydiyyatdan keçmişik. 2016-cı ildən DAA bir çox layihələrə imza atıb. Ola bilər ki, baş verən hadisələrə bizim fərqli baxış bucağımız olsun. Amma bizim bir qırmızı xəttimiz var. O da Azərbaycan dövlətçiliyi xəttidir. Dövlətçiliyə qarşı yönəlmiş bütün hədələrin, etirazların qarşısından böyük bir sədd çəkəcəyik. Avropada müəyyən şəxslər var ki, Azərbaycan dövlətçiliyinin əleyhinə fəaliyyət göstərir. Həmin insanların siyasi, ictimai təcrübəsi, savadı yoxdur. Araşdırdıqdan sonra bəlli olur ki, onların heç bir iş təcrübəsi yoxdur. Yalnız Avropada sosial müavinətlər alaraq ağızlarına nə gəldi yazırlar”.
DAA sədri əlavə edib ki, Birlik qurultayından sonra iki təşkilat bir ad altında birləşəcək: “Beləliklə, Azərbaycanın dünyada müsbət imicinin formalaşmasında, beynəlxalq təşkilatlarla əməkdaşlığın gücləndirilməsi istiqamətində çox ciddi addımlar atacağıq. Bundan başqa, ümidvarıq ki, prezident seçkiləri də Azərbaycanın inkişafında növbəti inkişaf mərhələsinin əsasını qoyacaq”.
Tədbir digər iştirakçıların çıxışı və müzakirələri əsasında davam etdirilib.
Bilman İsaq