Ukrayna Prezidenti Volodimir Zelenski ABŞ Prezidenti Co Baydeni Kiyevə dəvət edib.

Zelenski ABŞ-lı həmkarına bu barədə bazar günü telefon danışığı zamanı deyib.

"Yaxın günlərdə Kiyevə edəcəyiniz səfərin güclü mesaj və gərginliyin azaldılmasına töhfə olacağına inanıram”, - deyə o söyləyib.

Digər tərəfdən Ukrayna Rusiya rəsmilərini növbəti 48 saat ərzində görüş keçirməyə dəvət edib.

Ukrayna xarici işlər naziri Dmitro Kuleba bildirib ki, Rusiya sərhəddə hərbi gücləndirmələrin elan edilməsinə dair sorğuya hələ cavab verməyib:

"Bundan sonrakı addım onlardan növbəti 48 saat ərzində görüş tələb etmək olacaq."

Qeyd edək ki, V.Zelenski bundan əvvəl Kanada baş nazirini də Ukraynaya dəvət etmişdi.

Xatırladaq ki, Rusiyanın fevralın 16-da Ukraynaya hücum edəcəyi ilə bağlı məlumatlar yayılıb. Son günlərdə ABŞ, Britaniya, İsrail, Macarıstan hətta Rusiyanın özü də daxil olmaqla bir çox dövlətlər vətəndaşlarına Ukraynaya səfərlərini təxirə salmağa çağırıb.