Türkiyə 2040-cı il yanvarın 1-dən etibarən tütün məhsullarının satışını tamamilə qadağan edəcək böyük bir qanunvericilik islahatı hazırlayır.
ONN media xəbər verir ki, bu barədə Türkiyə mediası məlumat yayıb.
Məlumata görə, təşəbbüs hakim Ədalət və İnkişaf Partiyasının nümayəndələri tərəfindən Səhiyyə Nazirliyi ilə birgə hazırlanır və Avropa Birliyi ilə yaxınlaşma siyasətinin tərkib hissəsi kimi təqdim olunur.
Qanun layihəsində yaxın illərdə tütün məhsullarının dövriyyəsinə nəzarətin əhəmiyyətli dərəcədə sərtləşdirilməsi planlaşdırılır. Belə ki, siqaret satışının nağd şəkildə həyata keçirilməsi qadağan ediləcək, bütün əməliyyatlar elektron nəzarət sisteminə keçiriləcək.
Bundan əlavə, məktəblər, universitetlər, xəstəxanalar, dini obyektlər, idman meydançaları və çimərliklərin yaxınlığında siqaret çəkməyə məhdudiyyətlər tətbiq olunacaq. Eyni zamanda ictimai iaşə obyektlərinin açıq ərazilərində də siqaret qadağan ediləcək, yalnız xüsusi ayrılmış zonalarda siqaret çəkməyə icazə veriləcək və bu zonalarda qida və içki təqdim olunmayacaq.
Yetkinlik yaşına çatmayanlara tütün məhsullarının satılmasına görə 6 aydan 1 ilə qədər həbs cəzası nəzərdə tutulur. Qanunu pozanlara həmçinin 5 milyon lirədən 10 milyon lirəyədək cərimələr tətbiq oluna və biznes fəaliyyətləri dayandırıla bilər.
Layihəyə əsasən, 2040-cı ildən sonra Türkiyədə tütün məhsullarının istehsalı, satışı və yayılması tamamilə dayandırılacaq.