Xəzər rayonu Binə qəsəbəsində sərnişin avtobusu ilə qatarın toqquşması nəticəsində xəsarət alanların bəziləri evə buraxılıb, qalanlarının müalicəsi davam etdirilir.

ONN media xəbər verir ki, bu barədə Səhiyyə Nazirliyinin mətbuat xidmətinin mütəxəssisi Səfayə Əhmədova məlumat verib.

Onun sözlərinə görə, ötən gün 3 saylı Şəhər Klinik Xəstəxanasına yerləşdirilən 28 nəfərdən 16-sı evə buraxılıb.

“Hazırda 3 saylı Şəhər Klinik Xəstəxanasında 12 nəfərin müalicəsi davam etdirilir. Onların 5-i reanimasiya şöbəsində yerləşdirilib. Reanimasiyada olanlardan 2-nin vəziyyəti ağırdır. Dünən isə qəzadan sonra 3 nəfər əməliyyat edilmişdi. Həmin xəstəxanaın travmatologiya şöbəsində 2-si uşaq olmaqla 7 nəfər müalicəsini davam etdirir. Ötən gün Kliniki Tibbi Mərkəzə (KTM) yerləşdurilən 6 nəfərdən 2-nə ambulator yardım alaraq evə buraxılıb. Hazırda 4 xəstə reanimasiya şöbəsindədir və onlardan birinin vəziyyəti ağırdır”.

Elmi Tədqiqat Travmatologiya və Ortopediya İnstitutuna yerləşdirilmiş 3 nəfərdən 1-i evə buraxılıb. Onlardan 2-nin vəziyyəti ağırdır, onlardan 1-i əməliyyat ediləcək.