Bu gün Bakı Kitab Mərkəzində yazıçı Şərif Ağayarın Aprel şəhidi, polkovnik-leytenant Raquf Orucovun həyat və fəaliyyətindən bəhs edən “Komandir” romanının təqdimat mərasimi baş tutub. ONN media publika -ya istinadən xəbər verir ki, tədbirdə Teleqraf Holdinqin rəhbəri Aynur Camal, millət vəkilləri Aqil Abbas, Fazil Mustafa, Qənirə Paşayeva, yazıçı İlham Tumas və bir çox tanınmış şəxslər, oxucular iştirak edib. Şərif Ağayar tədbir iştirakçılarını salamlayaraq, onlara kitaba olan bu marağa görə təşəkkür edib. O, Heydər Əliyev Fondunun dəstəyi ilə ərsəyə gələn roman haqqında qonaqlara məlumat verib: “Arzu edirəm ki, Raquf Orucova layiq ölkə quraq. Bu roman Günəş haqqında şam yandırmağa bənzəyir. Raquf Orucov 25 ilini vətənin müdafiəsinə həsr edib. Bu 25 ili bir romanda qeyd etmək çətindir. Çalışdım ki, əsər arzuladığım səviyyədə olsun. Böyük qəhrəmanımızın ruhu şad olsun”. Daha sonra Raquf Orucova həsr edilən film izlənib. Millət vəkili Aqil Abbas Raquf Orucovun şəhid olduğu günü belə xatırlayıb: “Hadisə günü oğlum ağlaya-ağlaya dedi ki, Raquf Orucov şəhid olub. Elə danışdı ki, heç Mehdi Hüseynzadə haqqında belə danışmazdı. O, çox qeyri-adi adam olub. Şərif Ağayara minnətdaram, belə romanları yazmaq çətindir. 25 illik həyatı bir romana sığışdırmaq asan məsələ deyil. Bəzən bir anı yazmaq bir ömür yazmaqdan daha ağırdır. Allah bütün şəhidlərimizə rəhmət eləsin!” Millət vəkili Gövhər Baxşəliyeva da Raquf Orucovun qəhrəmanlığından danışıb və onun xatirəsinin yaşadılmasının önəmli olduğunu deyib. Qənirə Paşayeva Rafiq Orucovu yaxından tanıdığını, onun çox qəribə, maraqlı, ürəyi vətənlə döyünən komandir olduğunu bildirib: “Raquf Orucovun ömrü ön cəbhədə keçib, onun üçün ən önəmli şey torpaqları işğaldan azad edilmiş görmək idi. Raquf bəyin həyat yoldaşı Sevinc xanım buradadır. Ona təşəkkür edirəm”. Kitabın redaktoru İlham Tumas bu əsərin çox dəyərli olduğunu və yaxşı bir film materialı ola biləcəyini qeyd edib. Qənirə Paşayeva da çıxışında bu məsələyə xüsusi diqqət çəkib və bildirib ki, bu mövzuda ekran işinin ərsəyə gəlməsi çox vacibdir. Millət vəkili Fazil Mustafa da Raquf Orucovun qəhrəmanlığından bəhs edib. Tədbir digər iştirakçıların çıxışları ilə davam edib.