Hazırda paytaxtda yaşayan Şəhriyar Hüseynovun işsiz və xüsusi karantin rejiminə görə işini itirən aztəminatlı şəxslər üçün nəzərdən tutulan birdəfəlik ödəmələrlə bağlı müraciətinə qəribə cavab gəlib. Ona müraciət etdiyi müddətdə ölkədə olmadığı əsas gətirilərək, müraciətindən imtina edilib. ONN media bildirir ki, bu barədə  Ş.Hüseynovun özü məlumat verib. O bildirib ki, 10 ildir ölkədən kənara çıxmamasına baxmayaraq, sistem xətası səbəbindən 190 manatdan yararlana bilməyib. Məsələ bağlı saytımıza açıqlama verən Əmək və Əhalinin Sosial Müdafiəsi Nazirliyinin mətbuat katibi Fazil Talıbov isə deyib ki, vətəndaş müraciət edərkən sistemdə ölkədə olmadığı göstərildiyi üçün ona birdəfəlik ödəmədən imtina edilib: “Nazirlik aidiyyəti qurumların məlumat bazalarına sorğu göndərir və ordan alınan məlumatlara uyğun olaraq qərar verilir”.(axar.az)