“Prezident İlham Əliyev Füzuli Beynəlxalq Hava Limanının təməlqoyma mərasimində çox qısa zamanda buranın hazır olacağını qeyd etmişdi və belə də oldu”.

ONN media bildirir ki, bunu açıqlamasında millət vəkili Elman Məmmədov deyib.

Deputat qeyd edib ki, qısa bir zamanda çox möhtəşəm hava limanı inşa olunub: “Bu hava limanı bütün Azərbaycan üçün önəmlidir. Füzuli Beynəlxalq Hava Limanı region ölkələrilə Azərbaycanın münasibətini daha da yaxşılaşdıracaq. Bu aeroport həm sərnişinlərin, həm də yüklərin daşınmasında çox böyük rol oynayacaq. Ötən gün qürurverici anlar yaşandı və “Qarabağ” təyyarəsi cəmi 35 dəqiqəyə Füzuli Beynəlxalq Hava Limanına eniş etdi. Həmin hava limanından 100 kilometr uzaqlıqda Şuşa şəhəri yerləşir və bir saat ərzində oraya getmək olar. Vətəndaşlarımız gələcəkdə Füzulidən Zəngilana və oradan da Naxçıvana gedə biləcək”.

E.Məmmədov vurğulayıb ki, bu cür hava limanlarının olması ölkəmiz üçün böyük əhəmiyyət kəsb edir: “Bölgədə məskunlaşmanın və müəyyən məsələlərə nəzarətin daha operativ keçirilməsi üçün bu hava limanının böyük əhəmiyyəti var. Füzuli Beynəlxalq Hava Limanı qonşu dövlətlərlə əlaqələrin daha da güclənməsinə təkan verəcək. Bu hava limanından hərbi yüklərin daşınması üçün də istifadə ediləcək. Çünki burada hərbi-strateji məsələlərin də böyük əhəmiyyəti var. Gələcəkdə bu cür hava limanları Laçında və digər ərazilərdə də istifadəyə veriləcək və digər ölkələrdən də buraya turistlər gələcək. Prezident İlham Əliyev Füzuli Beynəlxalq Hava Limanında çıxış edərkən oranı Qarabağın Hava Qapısı adlandırıb. Çünki bu hava limanı vasitəsilə Bakı ilə Qarabağ arasında əlaqə daha da gücləndi”.