Ukrayna vətəndaşı olan Gürcüstanın keçmiş prezidenti Mixail Saakaşvili, bütün həbs müddətini vətənində keçirdikdən sonra Kiyevə qayıda biləcək.

ONN media  xəbər verir ki, bu barədə Gürcüstanın Baş naziri İrakli Qaribaşvili "Imedi" telekanalına müsahibəsində bildirib .

"Söhbət doqquz ildir Gürcüstanın prezidenti olan bir adamdan gedir. Bu bir fəlakətdir və təhqirdir: bir şəxs könüllü olaraq ölkəmizin vətəndaşlığından imtina etdi. Ukraynaya qayıtmaq istəyirsə, bunu sonra edə bilər. Cəzasını tam çəkdikdən sonra istədiyi yerə gedə biləcək", - deyə baş nazir bildirib.

Hökumət başçısı qeyd edib ki, keçmiş prezident həbsxananın işçilərindən onu Ukraynaya qaytarmağı xahiş edib:

"İndi təcili olaraq Ukraynaya qaytarılmasını istəyir. Həbsxanada çətin vəziyyətdə olduğunu başa düşdü. Həbs müddətini tam olaraq çəkəcək və hökumətdə onu azad edəcək adam tapmayacaq.

Mən tam məsuliyyətlə bəyan edirəm ki, Saakaşvili cəzasını tam olaraq çəkəcək. Bu gün o, altı il həbs cəzasına məhkum edilib. Bu hökm son instansiyada çıxarılıb. Planetdəki hər hansı bir insan bizə yaxınlaşıb azadlığa buraxılmasını istəsə belə, bu gün hökumətdə heç kim bunu etməyəcək".

Qaribaşvili, siyasətçini əfv etməkdən imtina edən Gürcüstan Prezidenti Salome Zurabişviliyə də təşəkkür edib.