Türk silahlı pilotsuz uçuş aparatlarına (SİHA) tələbat günbəgün artır.

ONN media  xəbər verir ki, türk səlahiyyətlilərindən biri "Röyters"ə Efiopiya və Mərakeşin "Bayraktar TB2"lərin alınması üçün Türkiyəyə müraciət etdiyini və müqavilələrdə ehtiyat hissələri və təlim məsələlərinin də ola biləcəyini bildirib.

Adının açıqlanmasını istəməyən diplomat Mərakeşin silahlı pilotsuz uçuş aparatları sifarişlərinin ilk partiyasını may ayında aldığını və Efiopiyanın tələbinin taleyinin hələ də aydın olmadığını qeyd edib.

"Röyters" adıçəkilən ölkələrin neçə silahlı pilotsuz uçuş aparatı alacağı və maliyyə detalları haqqında məlumat verməyib. Türkiyə də Efiopiya və Mərakeşə SİHA satışına dair razılaşma ilə bağlı rəsmi açıqlama verməyib.

Silahlı pilotsuz uçuş aparatlarının satışının Türkiyə iqtisadiyyatına töhfə verəcəyini ifadə edən "Röyters"in dərc etdiyi xəbərdə qeyd olunub ki, bu, iqtisadi problemləri aradan qaldırmaq üçün ixracatı artırmağa çalışan Türkiyə hökumətinə dəstək olacaq.

Türkiyənin Suriya və Liviyada silahlı pilotsuz uçuş aparatlarından istifadə etdiyini xatırladan "Röyters" "Qarabağdakı pilotsuz uçuş aparatları Azərbaycanın işğalçı qüvvələri məğlub etməsinə kömək etdi", - deyə qeyd edib.

Xəbərdə Rəcəb Tayyib Ərdoğanın Qərb silahlarına olan etibarını azaltmaq üçün yerli istehsalını artırmasından sonra Türkiyənin dünyanın dördüncü ən böyük pilotsuz təyyarə istehsalçısı olduğu vurğulanıb.