Türkiyənin Siirt vilayətinin kəndlərində fermerlər heyvanlarını otarmağa çoban tapa bilmirlər.

ONN media xəbər verir ki, əkinçilik və heyvandarlıqla məşğul olmaq istəməyən gənclər onlara fermerlər tərəfindən təklif olunan 10 min lirə (təxminən 1230 manat) maaşı qəbul etmirlər.

Sürü sahibi Zeki İmaç qışın gəlişi ilə heyvanlarına baxmağa, onları isti bölgələrə aparmağa çoban tapa bilmədiklərini deyib və heyvandarlıqla məşğul olmaq üçün işçilərin yoxluğundan şikayətlənib.

Qışda heyvanlara qulluq edəcək işçi tapa bilmədikləri üçün ailə üzvləri ilə növbəli şəkildə çobanlıq etdiklərini deyən fermer yorucu və tələbkar iş olduğu üçün heç kimin bu sahəyə üstünlük vermədiyini qeyd edib: "Hazırda Siirtdəyik, Şırnakdan Cizrəyə gedirik. Çobanlıq çox çətindir. Onlara ayda 10 min lirə təklif etsək də, çoban tapa bilmirik. "Gəlirlər, bir həftə işləyirlər, sonra isə qaçıb gedirlər. Buna görə də özümüz məşğul oluruq. İllərdir heyvandarlıqla məşğul oluruq, çətin bir peşədir".