Ağ Evin Milli Təhlükəsizlik Şurasının sözçüsü Emili Horn milli təhlükəsizlik müşaviri Ceyk Sallivanın Ermənistanın Milli Təhlükəsizlik Şurasının katibi Armen Qriqoryan ilə görüşü barədə bəyanat yayıb.

ONN media Ağ Evin saytına istinadla xəbər verir ki, bəyanatda deyilir:

"Milli təhlükəsizlik müşaviri Ceyk Sallivan Ermənistan Milli Təhlükəsizlik Şurasının katibi Armen Qriqoryanla görüşüb. Cənab Sallivan ABŞ-ın Ermənistanda və Cənubi Qafqaz regionunda sülh, təhlükəsizlik və firavanlığa sadiqliyini çatdırıb.

O, iki tərəf arasında davam edən ünsiyyəti alqışlayıb və ABŞ-ın həm ikitərəfli, həm də Minsk Qrupunun həmsədri kimi etimad quruculuğu tədbirlərini və regional barışığı dəstəkləməyə davam etmək öhdəliyini vurğulayıb.

Cənab Sallivan Türkiyə və Ermənistanın normallaşma prosesini müzakirə etmək üçün xüsusi nümayəndələr təyin edəcəkləri barədə bəyanatı alqışlayıb".