Kollektiv Təhlükəsizlik Müqaviləsi Təşkilatı (KTMT) Qazaxıstana beynəlxalq sülhməramlılar kontingentinin göndərilməsini rəsmən təsdiqləyib.

ONN media xəbər verir ki, bu barədə “RİA Novosti” məlumat yayıb.

Təşkilatın katibliyindən verilən məlumata görə, sülhməramlı qüvvələrin vəzifələrinə dövlət və hərbi obyektlərin mühafizəsi, habelə asayişi təmin edən qüvvələrə köməkliyin göstərilməsi daxildir. 

Bundan əlavə, məlum olub ki, KTMT-nin qabaqcıl bölmələri artıq bu vəzifələri yerinə yetirməyə başlayıb.

“Hazırda sülhməramlı kontingentin Rusiya hissəsi Rusiya Aerokosmik Qüvvələrinin hərbi-nəqliyyat aviasiyasının təyyarələri vasitəsilə Qazaxıstan Respublikası ərazisinə keçirilir. Onun tərkibində olan aparıcı bölmələr artıq qarşıya qoyulan vəzifələri yerinə yetirməyə başlayıblar” - məlumatda bildirilib.

Həmçinin məlum olub ki, Qırğızıstan KTMT çərçivəsində Qazaxıstana dəstək verməyə hazır olduğunu bəyan edib.