Nigeriyanın cənub-qərbində yerləşən Oqun ştatında benzindaşıyan avtomobil mikroavtobusla toqquşub.

Bu barədə yerli media federal yol hərəkətinin təhlükəsizliyi xidmətinə istinadla məlumat yayıb.

Məlumata görə, toqquşma və ardınca baş verən güclü partlayış nəticəsində azı 17 nəfər həlak olub.

“Ölənlərin ümumi sayı müəyyənləşməyib, lakin cəmi 17 cəsəd tapılıb”, - deyə xidmətin nümayəndəsi bildirib. O əlavə edib ki, cəsədlər yanaraq tanınmaz hala düşdüyü üçün onların şəxsiyyətini müəyyənləşdirmək çətinləşib.

İlkin məlumata əsasən, insidentə ehtiyatsızlıq və yol hərəkəti qaydalarının pozulması səbəb olub. Bu da baş-başa toqquşmaya və partlayışa gətirib çıxarıb.