Rusiya prezidenti Vladimir Putin Almaniya və Fransa liderləri Olaf Şolts və Emmanuel Makrona məlumat verib ki, o, yaxın gələcəkdə qondarma "LXR/DXR" tanınması ilə bağlı müvafiq fərman imzalamaq niyyətindədir.

ONN media xəbər verir ki, bu barədə Kremlin rəsmi saytı məlumat yayıb.

Məlumata görə, Rusiya Prezidenti Vladimir Putin Fransa Respublikasının Prezidenti Emmanuel Makron və Almaniya Federativ Respublikasının Federal Kansleri Olaf Şolz ilə telefon danışığı aparıb. Vladimir Putin Rusiya Federasiyası Təhlükəsizlik Şurasının Donbass ətrafında mövcud vəziyyəti Dövlət Dumasının qondarma "Donetsk və Luqansk Xalq Respublikaları"-nı tanınması ilə bağlı qətnaməsi kontekstində nəzərdən keçirən geniş tərkibli iclasının nəticələri barədə məlumat verib.

Bütün bunları nəzərə alaraq, Rusiya prezidenti yaxın vaxtlarda müvafiq fərman imzalamaq niyyətində olduğunu bildirib.

Fransa prezidenti və Almaniyanın federal kansleri hadisələrin belə inkişafından məyus olduqlarını bildiriblər. Eyni zamanda, onlar əlaqələri davam etdirməyə hazır olduqlarını qeyd ediblər.