Prezident Volodimir Zelenski Rusiyadan artan hərbi təhlükə ilə əlaqədar ehtiyat qoşunların çağırılması ilə bağlı fərman imzalayacağını bildirib.

ONN media Ukrayna mətbuatına istinadən xəbər verir ki, Zelenski birbaşa çıxışı zamanı qeyd edib ki, “Mən ehtiyatda olan hərbçilərin xüsusi müddətdə hərbi xidmətə çağırılması haqqında fərman imzaladım. Vurğulayıram ki, bunlar yalnız operativ ehtiyata yazılan vətəndaşlardır. Biz Ukrayna ordusunun əməliyyat vəziyyətində bütün mümkün dəyişikliklərə hazırlığını artırmalıyıq”.

Zelenski çıxışı zamanı əminliklə qeyd edib ki, ümumi səfərbərliyin elan olunmasına ehtiyac yoxdur. Eyni zamanda, Silahlı Qüvvələrin Ali Baş Komandanı bütün hərbi qulluqçular üçün əlavə təlim-məşq toplantılarının keçirilməsi ilə bağlı sərəncam imzalayıb.

Zelenski onu da əlavə edib ki, Ukrayna Türkiyə və Almaniya liderləri ilə birlikdə BMT Təhlükəsizlik Şurasına üzv ölkələrin liderlərinin sammitini təşkil etməyə çalışır. Onun sözlərinə görə, Türkiyə prezidenti Rəcəb Tayyib Ərdoğan belə bir tədbirdə iştirak etməyə hazır olduğunu artıq təsdiqləyib.