Latviya Seymi (parlamenti - red. ) bu gün növbədənkənar iclasında təcili olaraq "Milli təhlükəsizlik haqqında" Qanuna respublika sakinlərinə Ukrayna tərəfində könüllü kimi döyüşməyə icazə verən dəyişiklikləri təsdiqləyib. 

Bu barədə LETA agentliyi məlumat yayıb.

Qanuna düzəlişlər fevralın 27-də axşam saatlarında Müdafiə, Daxili İşlər və Korrupsiyanın Qarşısının Alınması üzrə Komissiya tərəfindən konseptual olaraq təsdiqlənib. 

Dəyişikliklərdə Ukraynada xidmətə başlayanlar dərhal silahlı qüvvələrin ehtiyatının qeydiyyat bölməsində qeydiyyatdan keçməli olacaqlar.

İndiyədək qanun Latviya vətəndaşlarının silahlı qüvvələrdə, daxili orduda, hərbi təşkilatda, kəşfiyyat və ya təhlükəsizlik xidmətində, xarici dövlətin polis və ya ədliyyə xidmətlərində və ya beynəlxalq hüququn digər subyektlərində xidmət etməsini qadağan edirdi.