Martın 2-sində Polşa Seyminin deputatları Polşa vətəndaşlarının Ukraynada yaradılan Beynəlxalq Ərazi Müdafiə legionuna qoşulmasını asanlaşdıran qanun qəbul edə bilərlər. 

ONN media  xəbər verir ki, bu barədə "Gazeta Wyborcza" qəzeti məlumat yayıb.

Nəşrin yazdığına görə, bu imkanı sadələşdirən qanun layihəsi Polşa Kəndlilər Partiyasının (PSL) deputatları səsverməyə çıxarmaq niyyətindədir. 

Seymin sədr müavini Petr Zqorjelski qəzetə bunları deyib: “Partiyanın fraksiyası olaraq biz bu qanun layihəsini təqdim edəcəyik, lakin düşünürəm ki, onu həm müxalifət, həm də hakim partiyanın fraksiyası dəstəkləyəcək”.

Hazırda Polşada qüvvədə olan qanun ölkə vətəndaşlarına yalnız Daxili İşlər Nazirliyinin icazəsi və Milli Müdafiə Nazirliyinin tövsiyəsi əsasında xarici ölkələrin ordularında xidmət etməyə icazə verir.

Qeyd edək ki, fevralın 27-sində Ukrayna Prezidenti Vladimir Zelenski ölkədə xarici ərazi müdafiə legionu yaradıldığını elan edib. "Ukrinform"un məlumatına görə, əcnəbilərdən ayrıca bölmə - Ukraynanın Beynəlxalq Ərazi Müdafiəsi Legionu yaradılacaq.