“Apple” Rusiyada avadanlıqların satışını və tədarükünü dayandırdığını elan edib. Belə ki, şirkətin saytında çatdırılma sütununda “iPhone”, “MacBook” və ya digər cihaz sifariş etmək istəyərkən onun mövcud olmadığı bildirilir. 

Bu qərar Rusiyaya qarşı sanksiyaların tətbiqi və Ukrayna hadisələri fonunda qəbul edilib. Şirkətin bəyanatında qeyd olunur ki, təkcə satış deyil, tərəfdaşlara çatdırılma da dayandırılıb.

Rusiya “Apple Pay” və digər xidmətlərin işini məhdudlaşdıracaq

“Biz Rusiyada bütün məhsul satışlarını dayandırdıq. Keçən həftə bütün paylama kanalları vasitəsilə ixracı dayandırdıq. “Apple Pay” və digər xidmətlərin fəaliyyətində də məhdudiyyətlər var”, -  şirkətin açıqlamasında bildirilir. Bununla belə, söhbətin xidmətin tamamilə bloklanmasından və ya sanksiyalara məruz qalan banklarla işin dayandırılmasından getdiyi məlum deyil.

Bundan əlavə, Rusiya istisna olmaqla, bütün dünyada “RT News” və “Sputnik News”un proqramları “App Store”dan silinəcək. Ukrayna vətəndaşlarının müdafiəsi üçün “Apple Maps” xidməti real vaxt rejimində yol-nəqliyyat hadisələrinin göstərilməsi funksiyalarını söndürüb.

Mərkəzi Bank “Apple Pay”in dayandırılması ilə bağlı xəbərdarlıq edib

Fevralın 25-də Rusiya Mərkəzi Bankı sanksiya tətbiq olunan bankların kartları üçün “Apple Pay” və “Google Pay”in ləğvi barədə xəbərdarlıq edib. Mərkəzi Bankın mesajında bütün buraxılmış kartların Rusiya ərazisində işləyəcəyi, standart əlaqə və ya kontaktsız ödənişin tam həcmdə mümkün olacağı, lakin bu bankların kartlarının “ApplePay”, “GooglePay” xidmətləri ilə istifadə oluna bilməyəcəyi qeyd edilib. 

Kartlarla əlaqəli hesablardakı müştəri vəsaitləri saxlanılır, lakin xarici onlayn mağazalarda ödənişlər üçün istifadə edilə bilməz.

Ukraynadan Tim Kuka məktub 

Fevralın sonunda Ukrayna baş nazirinin müavini Mixail Fyodorov “Apple” şirkətinin baş direktoru Tim Kuka açıq məktub göndərərək Rusiyanı boykot etməyə çağırıb. Onun məktubunda deyilir: “Mən sizə yazıram və əminəm ki, nəinki eşidəcəksiniz, həm də Ukraynanı, Avropanı və nəhayət, bütün demokratik dünyanı qorumaq üçün mümkün olan hər şeyi edəcəksiniz. “App Store”a girişi bloklamaq da daxil olmaqla, Rusiyaya “Apple” xidmət və məhsullarını tədarük etməyi dayandırın”. 

“App Store” və digər şirkət xidmətləri Rusiyada fəaliyyətini davam etdirir

Mixail Fyodorovun müraciətinə baxmayaraq, Rusiyada “App Store” mağazası, “Apple Music”, “TV+”, “Arcade” və şirkətin digər xidmətlərinə abunəlik işləri davam edir. Bununla belə, “Apple”ın bəyanatında deyilir ki, şirkət vəziyyəti qiymətləndirməyə və müvafiq hökumətlərlə əlaqə saxlamağa davam edəcək.

Rusiyada “Apple” avadanlığının qiyməti son günlər artıb

Rəsmi mağazalarda məhdudiyyətlər tətbiq olunmazdan əvvəl də “Apple” avadanlıqlarının qiyməti artıb. Orta hesabla “Apple” avadanlığı həftədə 15-40% bahalaşıb və bir çox mağazalarda məşhur modellər tükənir.(publika.az)