Rusiyanın Ukraynaya hücumları ən çox uşaqlara təsir edir. 

Xarkovda yaşayan 13 yaşlı Maksimin saçları müharibənin stres və qorxusundan ağarıb. Lvovda anası və bacı-qardaşları ilə idman zalında yaşayan Maksim rus hücumları başlayandan qısa müddət sonra saçlarının ağardığını deyib.

“Xarkovda çox şiddətli partlayışlar olur, mülki evlərə və fabriklərə ziyan dəyib. Biz adətən evdə qalırdıq. Pəncərəsiz otaqlarda gizlənirdik ki, bomba düşsə, pəncərələr partlayıb üstümüzə gəlməsin. Oturub partlayışların dayanmasını gözlədik. Dəhşətli idi və biz bura gəlməyə qərar verdik. Bu hadisələrdən 3 həftə ərzində saçlarım ağardı. Onlar şəhərin mərkəzini vurdular. İnsanlarımızı, görməli yerlərimizi gülləbaran etdilər. Döyüş təyyarələri uçurdu, tanklar küçələrdə gəzirdi. Dəhşətdir, amma birtəhər yaşayırıq. Kaş ki, müharibə bitəydi. Sığınacaqdan sığınacağa, şəhərdən şəhərə qaçmaq yox, məktəbə getmək istərdim” - azyaşlı deyib.

Qeyd edək ki, Ukraynada Rusiyanın başlatdığı müharibə nəticəsində martın 18-nə qədər ölkədə 109 uşaq həlak olub, 130-dan çoxu yaralanıb.