Sultan Dadaşov olayından artıq ən azı 4 gün keçdi: araşdırma gedirmi?

Bilmirik, bildiyimiz odur ki, nəticə yoxdur: video yayılan gecənin səhərisi, saat 11:00 radələrində “25 sutka həbs edildi” yalanını mediaya ötürüb, sosial şəbəkələrdə alovlanan odun üzərinə yaxşıca bir su səpdilər. Daha deyən olmadı ki, gecə 23 radələrində yayılan görüntü ilə bağlı nə zaman araşdırma aparıldı, hüquq-mühafizə orqanı əməkdaşı haçan izahatlar aldı, nəyi müəyyənləşdirdi ki, səhər 11 radələrində cinayət işini məhkəməyə göndərə bildi və cəza da verdirdi!

Əsas məsələ bu məlumatın yayılması idi: yayıldı, ancaq rəsmi təsdiq olmadı – həm DİN, həm də “həbs qərarı verən” məhkəmə olayı təkzib etdi. İstintaqla bağlı isə heç bir məlumat verilmir – tam bir sükut!

Məsələnin ən maraqlı cəhəti bilirsinizmi nədir? Çığır-bağır salan, “Leksus”un ayağını az qala şikəst etdiyi səviyyədə yaraladığı görüntüsünü yaratmaq üçün videoda “aayyyyy” edən, söyülən və döyülən motosikl sürücüsü – Murad Salman adlı şəxsdən də heç bir xəbər yoxdur. O, nəinki ədalətsizliyə məruz qalması barədə paylaşımlar edir, ümumiyyətlə sorğulara cavab vermir və suallardan yayınır.

Belə görünür ki, bank işçisi olan mopedli Murad Salman artıq Dadaşovla bütün məsələləri öz ixtisasına uyğun yoluna qoyub: yəqin ki, şikayətçi olmadığı haqda DİN-in araşdırma aparan əməkdaşına, polisinə, polis şöbəsinə ərizə də verib, bəlkə də Sultan Dadaşovun cəza almaması üçün nazirə bir xahişnamə də yazıb. Əks halda ortada olardı, cəza tələb edərdi...

Barışıblarsa, lap yaxşı – zatən S.Dadaşov da öz səhvini dərhal başa düşən kişi olduğunu mediaya ilk açıqlamasındaca sübut etdi.

Ancaq məsələ bu cür yekunlaşacaqdısa, o videonu yaymaq cəmiyyətə xəyanət etməkdir, pis bir ənənənin ictimai təfəkkürdə oturuşmasına yol açmaqdır.

Murad Salmanın timsalında prinsiplərindən, hüquqlarından hansı səbəbdənsə geri duran şəxslər uzun illərdir ki, çox pis presedent yaradıblar. Əminəm ki, bu hadisənin bu cür yekunlaşmasından sonra Murad Salman və yaxud o statusda olan hansısa bir kəsi “Gelandevagen”i olan başqa ağsaqqal daha ağır sözlərlə təhqir edib, 3 yox, 6 qapaz və üstəlik, bonus olaraq bir yumruq da ilişdirməkdə heç bir qəbahət görməyəcək. Çünki Sultan Dadaşovlar nümunəsində bağışlanma formalarını görürlər; Sultan Dadaşov simasında heç bir cəzanın olmadığını və çığır-bağır salanların da dərhal susduqlarını bir daha müşahidə edirlər. Sizcə, “leksus”lu Dadaşovun maşınla, dili və əli ilə vurub, sonra susdurduğu gənci “hammerli” filənkəsov susdura bilməyəcəyini düşünəcək və özünü daha intizamlı aparacaq?

Bax, belə edirsiniz ki, sizi küçədə basıb döyə bilirlər.

Hələ az döyüb, az söydü yoldaş Dadaşov! Onun şapalaqlayan əlinə, “sən kimsən əəəə” deyə bağıran dilinə quzu kəsim!

İndi Dadaşovun “harınlamış əlini” söyməyə haqq etmədiyinizi qandınızmı?

O əlləri siz harınlatmısınız, indi də qapazlarını nəyinsə müqabilində yeyirsinizsə, heç olmasa, susun!