Türkiyə xarici işlər naziri Mövlud Çavuşoğlu Venesuela səfəri çərçivəsində bu ölkənin prezidenti Nikolas Maduro ilə görüşüb.

Görüşdən sonra tərəflər mətbuata birgə açıqlama verib.

Çavuşoğlu Venesuela ilə Türkiyə arasında 7 sənədin imzalandığını bildirib:

“Biz Venesuelaya hər zaman inandıq və yanında olduq. Xüsusilə bu dövrdə iqtisadi əməkdaşlığımız sürətlə artdı. İki ölkə arasında ticarət dövriyyəsi 2021-ci ildə əvvəlki ilə nisbətən təxminən 300 faiz artıb. Aradakı məsafəyə baxmayaraq, Türkiyə olaraq bu gün Venesuela ixracatında birinci yerdəyik. Bu il də ticarət həcmini 1,5 milyard dollara çatdırmağı planlaşdırırıq”.