"Qanunsuz miqrasiya qlobal problemdir. Qərb bu məsələdə əməkdaşlıq etməlidir".

ONN media xəbər verir ki, bunu Türkiyə Böyük Millət Məclisinin sədri Mustafa Şentop İstanbulda Ramazan bayramı münasibətilə təşkil edilən tədbirdə deyib. 

Şentop Qərbin ikiüzlü rəftarını tənqid edib. O bildirib ki, qeyri-qanuni miqrasiyaya görə hər kəs məsuliyyət daşımalıdır.

"Uzun illərdir nizamsız miqrasiya ilə bağlı yaşadığımız, buna yalnız uzaqdan baxan, çağırışlarımıza cavab verməyən, kifayət qədər dəstəyi olmayan Avropa ölkələri indi burunlarının dibində daha ciddi bir problemlə qarşı-qarşıyadır", - məclis sədri qeyd edib. 

Şentop köç probleminin həlli ilə bağlı təkliflərini bir daha xatırladıb:

"Köç dediyimiz bir ölkənin problemi deyil. Bu, qlobal problemdir. Və biz yəqin ki, bunun başlanğıc mərhələsindəyik. Nə etməli? Əslində bunun həlli bəsitdir. Burada döyüşməyəcəksiniz, münaqişə etməyəcəksiniz. İnsanların doğulduqları torpaqlarda təhlükəsizliyi, əmin-amanlığı və inanclarına uyğun şəkildə yaşaya biləcəkləri mühit yaratmaq vacibdir".