İranın büdcə quruluşunda yeni islahatlar gəlirlərin neft daxilolmalarından birbaşa asılılığına tam olaraq son qoymağa yönəlib. ONN media xəbər verir ki, bunu İranın Planlaşdırma və Büdcə Təşkilatının rəhbəri Məhəmməd Baker Nobaht 20 mart 2020-ci ildə başlayacaq növbəti İran maliyyə ili üçün büdcə quruluşunun hazırlanmasına dair ilk sessiyanın iclası zamanı deyib. "Sanksiyalarla əlaqədar çətin dövrləri nəzərə alsaq, büdcə ehtiyatlarının əhəmiyyətli bir hissəsini itirəcəyik; buna görə, gələn ilin büdcə islahatlarının neft gəlirlərindən birbaşa asılılığı sıfıra endirəcəyinə əmin olmaq lazımdır", - deyə o, qeyd edib. Nobaht əlavə edib ki, hətta sanksiyalarsız adi şəraitdə belə İrana əvvəlki kimi neft gəlirlərindən asılılığı azaltmaq lazımdır. "İlk dəfə olaraq ölkənin büdcə strukturunda islahatlar yolunda vacib bir addım atdıq", - deyə o bildirib.