Paytaxtın Nəsimi rayonunun Akademik Feyzulla Qasımzadə küçəsi 24 ünvanında məişət tullantılarının daşınması ilə məşğul olan şəxslərin maskasız olduğu üzə çıxıb. ONN media xəbər verir ki, təmizlik işçilərinin maskasız və xüsusi forma olmadan çalışmasının onların koronavirusa yoluxma riskini artırdığından, narahatlıqla qarşılanıb. Məsələ ilə BŞİH-nin Mənzil-Kommunal Təsərrüfatı Departamentinin Sanitariya və Texniki Təmizlik İdarəsindən saytımıza bildirilib ki, hazırda hər bir işçi xüsusi forma ilə təmin olunub və nəzarət gücləndirilib: “Artır bir neçə gündür ki, bütün kommunal təsərrüfatda məişət tullantılarının daşınması ilə məşğul olan şəxslər xüsusi forma ilə təmin edilib və onlara lazımi qədər maska, əlcək və digər virusdan qorunma vasitələri verilib. Bundan başqa koronavirusla əlaqədar gərgin iş rejimində çalışan təmizlik işçilərinin sanitar gigiyenik qaydalara əməl etmələri üçün nəzarət gücləndirilib. Təqdim edilən sözügedən fotonun isə köhnə olduğunu düşünürük”. Qeyd edək ki, foto 30 mart tarixində çəkilib və dərhal da BŞİH-nin Mənzil-Kommunal Təsərrüfatı Departamentinin Sanitariya və Texniki Təmizlik İdarəsinin münasibətini öyrənmək üçün sorğu ilə birgə göndərilib. İdarə sorğuya iki gün sonra cavab verib və işçilərin lazımı qoruyucu vasitələrlə təmin olunduğunu əks etdirən fotolar da təqdim edib.