Zəhərlənən şəxslər metil spirti içiblər. Bu spirt satışda olmamalıdır, onu əhaliyə satmaq qadağandır. Bu sözləri baş toksikoloq Azər Maqsudov geniş müsahibəsində koronavirusa görə spirt içib zəhərlənən şəxslər haqda deyib. O bildirib ki, metil spirti kimya sənayesində işlənən məhluldur: “Aptekdən satılan tibbi spirtin tərkibində də metil spirti aşkarlanıb. Bunun necə olması haqqında Qida Təhlükəsizliyi Agentliyi araşdırmalar aparır”. Baş toksikoloq metil spirtini tibbi spirtdən ayırd etməyin çətin olduğunu deyib: “Metil spirtinin qoxusu və rəngi tibbi spirtdən fərqlənmir. Tərkibi oxşardır. 30 milli litrdən çox qəbul etdikdə ölümcül doza verir. Biz şahidi də olduq, müraciət edən 13 xəstədən 8 nəfərinin ölüm səbəbi metil spirti içmələridir”. A.Maqsudov qeyd edib ki, metil spirti görmə qabiliyyətini pozur və korluq əmələ gətirir: “Daha sonra beyin mərkəzlərinin, qaraciyərin funksiyasını sıradan çıxarır. Beyinin fəaliyyətini korladıqdan sonra nəfəs mərkəzi zədələnir və ondan irəli gələn fəsadlaşma başlayır. Bu zaman xəstə ürək, ağciyər çatışmazlığından həyatını itirir”.