“Azəristiliktəchizat” aidiyyəti qurumlarla məsləhətləşmələr aparmadan mərkəzləşdirilmiş istilik sistemini dayandırmır. Bu sözləri Azəristiliktəchizat ASC-nin mətbuat katibi Rafiq Əliyev mövsümi qrafikə əsasən bu gecədən etibarən dayandırılacaq mərkəzləşdirilmiş istilik sistemi ilə bağlı danışarkən deyib. R.Əliyev bildirib ki, ASC hazırda Ekologiya və Təbii Sərvətlər Nazirliyinin məlumatları əsasında müvafiq araşdırmalar aparır: “Yəqin ki, gün ərzində bu barədə müvafiq qərar qəbul ediləcək. Qərardan sonra məlum olacaq ki, mövsümün müddəti uzadılacaq, ya yox. Çünki biz həmişə qərarı nazirliyin proqnozları əsasında qəbul edirik. Aidiyyəti qurumlarla birgə iş aparılır”. R.Əliyev onu da qeyd edib ki, mərkəzləşdirilmiş islilik sisteminin verilmə müddətinin uzadılması ancaq hava temperaturundan asılıdır: “Havanın temperaturu fəsil normalarından aşağı olacağı halda istiliyin verilmə müddəti uzadıla bilər. Digər hallarda uzadılması isə müəyyən qərarlar əsasında olur. Günün sonunda hansı qərar verildiyi məlum olacaq”. Xatırladaq ki, mərkəzləşdirilmiş istiliyin mənzillərə verilməsi hər il 15 noyabr tarixində başlayır, 15 aprel tarixində isə dayandırılır.