Parlament “Azərbaycan Respublikasının 2020-ci il dövlət büdcəsi haqqında” qanunu ikinci oxunuşda müzakirə edir. “Azərbaycan Respublikasının 2020-ci il dövlət büdcəsi haqqında” qanun layihəsinin birinci oxunuşda kifayət qədər aydın izahı verildi. Qeyd edək ki, büdcə gəlirlərinin 10 milyon manat azaldılması, xərclərin isə 5 milyon manat azalması nəzərdə tutulur”. ONN media  xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili deyib. Komitə sədri bildirib ki, azalmaların heç biri sosial ödənişlərə şamil olunmayıb: “Azalmanın əsas səbəbi isə vergi güzəştləri ilə əlaqədar vergi daxilolmalarının həcminin azalmasıdır. Birinci oxunuşda müzakirə zamanı əsas qabardılan məsələ təhsil haqlarının yarıbayarı azaldılması idi. Tələbələrin təhsil haqqının ödənilməsi 2019-2020-ci il təhsil ili üçün dövlət büdcəsi tərəfindən qarşılanacaq. Bizdə olan məlumata əsasən, buna görə 40 milyon manat vəsait ayrılıb”. Müdafiə, təhlükəsizlik və sahibkarlıqla bağlı büdcədə nəzərdə tutulan vəsaitlərin artırılması ilə bağlı birinci oxunuşda səslənən təkliflərə münasibət bildirən Tahir Mirkişili qeyd edib ki, müdafiə xərcləri ilə bağlı isə Prezidentin bu sahəyə ayırdığı maliyyə kifayət qədər yetərlidir: “Sahibkarlığa dəstək üçün əlavə 40 milyon manat nəzərdə tutulub. Bu, sahibkarlara dövlət dəstəyinin davam etdirilməsi deməkdir. İndiyə qədər 105 mindən çox sahibkara maliyyə dəstəyi verilib. İnvestisiya xərcləri isə azaldılmayıb, olduğu kimi saxlanılıb”.