Vurğulanır ki, A.Bəşirqızının Azərbaycan səhnə sənətinə verdiyi töhfələr dövlətimiz tərəfindən yüksək qiymətləndirilib. Ən mötəbər fəxri adlara, həmçinin “Şöhrət” ordeninə, “Azərbaycan Respublikası Prezidentinin fəxri diplomu”na layiq görülüb. O eyni zamanda Prezidentin fərdi təqaüdçüsüdür. Bütün bunlar dövlətimizin sənətkarın yaradıcılığına olan diqqət və qayğısının bariz göstəricisidir. “Daima dövlətin Sizə göstərdiyi bu etimadı doğruldur, zəngin köklərə malik Azərbaycan teatrını, milli-mənəvi dəyərlərimizi yaşadır, onları gələcək nəsillərə sağlam şəkildə ötürərək mənəvi borcunuzu yerinə yetirirsiniz. Əminik ki, bundan sonra da qazandığınız bilik və təcrübənizi Azərbaycan teatrına sərf edəcək, milli mədəniyyətimizin inkişafı üçün öz dəyərli xidmətlərinizi əsirgəməyəcəksiniz”, - deyə təbrikdə bildirilir. Anar Kərimov sonda bir daha Afaq Bəşirqızını doğum günü münasibətilə Mədəniyyət Nazirliyinin kollektivi və öz adından səmimi qəlbdən təbrik edib, möhkəm cansağlığı və yeni yaradıcılıq uğurları arzulayıb.