"Konstitusiya Mühafizəsi Şurası prezident seçkilərinin 18 iyun 2021-ci il tarixində keçirilməsini qərara alıb". ONN media xəbər verir ki, bunu İran Daxili İşlər nazirinin müavini və İran Ali Seçki Şurasının sədri Camal Orf deyib. "Seçkilərin təxirə salınması barədə hansısa fikir yoxdur. Pandemiya davam edir, ona görə də seçki zəruri sağlamlıq protokollarını tətbiq etməklə aparılacaq. Çünki hökumət seçkilərin vaxtında keçirilməsini təmin etməlidir. Seçiləcək hökumət işi tam əlinə almalıdır, mövcud hökumət bu tarixdən sonra işini davam etdirə bilməz. Ümid edirik ki, COVID-19 seçki tarixinə qədər nəzarət altına alınacaq", - C.Orf bildirib. Qeyd edək ki, fevralın 21-də keçirilən İran parlament seçkiləri ölkə tarixində ən aşağı səviyyədə olub. Bu seçkilərdə iştirak nisbəti 42,5 faiz olaraq qeyd edilib, bu da inqilabdan sonrakı 40 il ərzində ən aşağı nəticədir.