Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev bu gün Baş Prokurorluğun keçirdiyi brifinqdən sonra jurnalistlərin suallarını cavablandırıb.  H.Hacıyev deyib ki, Azərbaycan həmişə danışıqlar masasında iştirak edir: “Danışıqlar prosesini dağıdan, məhv edən Ermənistan Respublikasıdır. Ona görə də ilk növbədə Ermənistana müraciət olunmalıdır ki, Ermənistan özünün işğalçılıq siyasətinə son qoysun. Danışıqlar naminə danışıqlar da artıq hər kəsi taqətdən salıb. Danışıqlar prosesindən konkret nəticə gözlənilir. Ona görə də proses ilk növbədə nəticə yönümlü olmalıdır ki, Azərbaycanın işğal olunmuş ərazilərindəki Ermənistanın silahlı qüvvələrinin mövcudluğuna son qoyulsun və Ermənistan qoşunları Azərbaycanın işğal olunmuş ərazilərindən çıxarılsın, BMT Təhlükəsizlik Şurasının aidiyyatı qətnamələrinin həyata keçirilməsi təmin olunsun. Azərbaycan öz konstruktivliyini, özünün danışıqlar prosesindəki mövqeyini aydın və birmənalı şəkildə ifadə edib. Hesab edirik ki, indiki şəraitdə də beynəlxalq ictimaiyyət Ermənistanın üzərinə daha böyük siyasi diplomatik təzyiqlər qoymalıdır ki, Ermənistan öz qoşunlarını Azərbaycanın işğal olunmuş ərazilərindən çıxarsın. Bütün bunlar barədə də Prezident İlham Əliyev beynəlxalq media kanallarına verdiyi müsahibədə ətraflı məlumat verib”.