Rustavi şəhərindən "Qırmızı körpü" sərhəd keçid məntəqəsinə qədər olan yolun tikintisi təxirə salınıb.

ONN media xəbər verir ki, bu barədə regional inkişaf və infrastruktur naziri vəzifəsini icra edən Maya Tskitişvili bildirib.

Onun sözlərinə görə, buna koronavirus pandemiyasının yaratdığı maliyyə resurslarının çatışmazlığı səbəb olub:

“Rustavi-Qırmızı körpü və Rustavi-Sadaxlı yol hissələri də bu layihələrdəndir. Onlara 2023-cü ilə qədər start verə bilməyəcəyik. Layihələrin həyata keçirilməsinə hazır olsaq da, maliyyə və fiskal çərçivə buna imkan vermir”.

Qeyd edək ki, ötən ilin fevralında Rustavi-Qırmızı körpü və Rustavi-Sadaxlı magistral yollarının inşası ilə bağlı Avropa İnvestisiya Bankı Gürcüstana 250 milyon avro həcmində kredit ayırıb. Tikinti işlərinin 2023-cü ilədək başa çatdırılması planlaşdırılırdı.