Müəyyən tədqiqatlarda xəstəliyin 14-cü günündə xəstələrin vəziyyətində olan yaxşılaşmanın “favipiravir” dərmanı ilə birbaşa əlaqəsinin olması elmi baxımdan sübut olunmayıb. Başqa sözlə desək, həmin insanlar o dərmanı içməsələr də, xəstəliyin 14-cü günündə sağalarlar. ONN media  xəbər verir ki, bunu Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru, azərbaycanlı alim Nuran Abdullayev qeyd edib. O bildirib ki, ev şəraitində xəstəliyi yüngül keçirənlərə yazılan “favipiravir” dərmanının tətbiqinin heç bir elmi əsasına rast gəlməyib: “Dərmanın bütün yaş qruplarında həkim məsləhəti olmadan qəbulunu düşünəndə bunun nə fəsadlar törədə biləcəyini bir həkim kimi öncədən görmək o qədər də çətin deyil. Yeni qurulacaq səhiyyə sistemində dərman bazarı “bazar” səviyyəsində yox, insanlara düzgün xidmət edəcək səviyyədə təşkil edilərək idarə olunmalıdır”.   /Axar.az/