Cəzaya məhkum edilən, şərti məhkum edilən və ya cəzadan şərti olaraq vaxtından əvvəl azad edilən şəxslər elektron nəzarət vasitənin işlək vəziyyətdə saxlanılması üçün ona üzrsüz səbəbdən xidmət etmədikdə məsuliyyət daşıyacaqlar. ONN media  xəbər verir ki, bununla bağlı Baş nazir Əli Əsədov “Məhkum edilmiş və ya barəsində qətimkan tədbiri seçilmiş şəxslərə tətbiq edilən elektron nəzarət vasitələrinin siyahısının və onların tətbiqi qaydalarının təsdiq edilməsi haqqında” qərar imzalayıb. Qərara əsasən, elektron nəzarət vasitənin işlək vəziyyətdə saxlanılması üçün ona üzrsüz səbəbdən xidmət etmədikdə Cəzaların İcrası Məcəlləsinə uyğun tədbirlərin görülməsi üçün icra məmuru (probasiya üzrə) tərəfindən məhkəməyə təqdimat verilir. Qeyd edək ki, Azərbaycan Respublikası Prezidentinin “Azərbaycan Respublikasının Cəzaların İcrası Məcəlləsində dəyişiklik edilməsi haqqında” qanunu ilə Cəzaların İcrası Məcəlləsində dəyişiklik edilərək aşağıdakı məzmunda 39.0.2-1-ci maddə əlavə edilib: “39.0.2-1. elektron nəzarət vasitəsini gəzdirməkdən imtina edənlər, onu zədələyənlər və ya digər üsulla yararsız vəziyyətə salanlar, yaxud həmin vasitənin işlək vəziyyətdə saxlanılması üçün üzrsüz səbəbdən ona xidmət etməyənlər;”. Bununla əlaqədar olaraq “Məhkum edilmiş və ya barəsində qətimkan tədbiri seçilmiş şəxslərə tətbiq edilən elektron nəzarət vasitələrinin siyahısının və onların tətbiqi qaydalarının təsdiq edilməsi haqqında” Azərbaycan Respublikası Nazirlər Kabinetinin 2018-ci il 10 aprel tarixli 144 nömrəli Qərarında dəyişiklik edilib. *** Nazirlər Kabineti 2010-cu il 1 iyul tarixli 129 nömrəli Qərarı ilə təsdiq edilən “Doktoranturaların yaradılması və doktoranturaya qəbul Qaydaları”nda dəyişiklik edib. Bununla bağlı Baş nazir Əli Əsədov qərar imzalayıb. Qərara əsasən, Silahlı Qüvvələrinin Hərbi Akademiyasının doktoranturasına qəbul imtahanları zamanı STANAG sertifikatına malik olan namizədlər xarici dil imtahanından azad olunur. Qeyd olunub ki, xarici dil üzrə beynəlxalq dil sertifikatı olan STANAG (Standardization Agreement 6001) Azərbaycan Respublikası Nazirlər Kabinetinin 2010-cu il 1 iyul tarixli 129 nömrəli Qərarı ilə təsdiq edilmiş “Doktoranturaların yaradılması və doktoranturaya qəbul Qaydaları”nın 3.10-1- ci bəndindəki siyahıya daxil edilmədiyi üçün Dövlət İmtahan Mərkəzinin bazasına yerləşdirilməyib. STANAG NATO-da dil səviyyəsinin qiymətləndirilməsi üzrə ən aparıcı mexanizm hesab olunur. NATO-nun bütün tərəfdaşlıq proqramlarına qoşulmuş ölkələr Alyans çərçivəsində keçirilən tədbirlərə cəlb olunan, eləcə də vəzifələrə təyin edilən zaman onlardan STANAG sertifikatı tələb olunur. Bu baxımdan, Silahlı Qüvvələrin şəxsi heyətinin dil bacarıqlarının STANAG əsasında mütəmadi qiymətləndirilməsi aparılır. Bununla əlaqədar olaraq, STANAG sertifikatına malik olan namizədlərin Azərbaycan Respublikası Silahlı Qüvvələrinin Hərbi Akademiyasının adyunkturasına (doktoranturasına) qəbul imtahanları zamanı xarici dil imtahanından azad olunması məqsədilə “Azərbaycan Respublikası Nazirlər Kabinetinin 2010-cu il 1 iyul tarixli 129 nömrəli Qərarı ilə təsdiq edilmiş “Doktoranturaların yaradılması və doktoranturaya qəbul Qaydaları”nda dəyişiklik edilməsi haqqında” Azərbaycan Respublikası Nazirlər Kabineti Qərar qəbul edib. *** Nazirlər Kabineti “Sosial müavinətlərin, təqaüdlərin və kompensasiyaların təyin olunması üçün təqdim edilən sənədlərin və məlumatların rəsmiləşdirilməsi, baxılması və saxlanılması Qaydaları”nın təsdiq edilməsi haqqında” qərarda dəyişiklik edib. Bununla bağlı Baş nazir Əli Əsədov qərar imzalayıb. Qərara əsasən, övladlığa götürülən uşağa, o cümlədən sağlamlıq imkanları məhdud 18 yaşınadək uşağa görə müavinətin verilməsi proseduru müəyyən edilib. Belə ki, “Sosial müavinətlər haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2020-ci il 6 oktyabr tarixli 181-VIQD nömrəli Qanuna müvafiq olaraq övladlığa götürülən uşağa, o cümlədən sağlamlıq imkanları məhdud 18 yaşınadək uşağa görə müavinət növü müəyyən edilib. Bununla əlaqədar olaraq, “Sosial müavinətlərin, təqaüdlərin və kompensasiyaların təyin olunması üçün təqdim edilən sənədlərin və məlumatların rəsmiləşdirilməsi, baxılması və saxlanılması Qaydaları”nın təsdiq edilməsi haqqında” Azərbaycan Respublikası Nazirlər Kabinetinin 2015-ci il 21 sentyabr tarixli 311 nömrəli qərarında dəyişiklik edilib və həmin Qərarda 18 yaşınadək uşağa görə müavinətın verilməsi proseduru müəyyən edilib.