AzTV, Mədəniyyət TV və İdman TV kanallarının yayımı bu gün saat 16:00-a qədər müvəqqəti olaraq dayandırılıb. AzTV-dən verilən məlumata görə, bu, HD yayıma keçidlə bağlıdır. Maraqlıdır, Azərbaycanda digər kanallar HD yayıma nə vaxt keçib? ONN media  xəbər verir ki, İctimai Televiziya hələ 2012-ci ilin may ayında HD yayımın ilk sınaqlarını edib. Kanal 16 oktyabr 2017-ci ildən HD yayıma tam keçid edib. Azad Azərbaycan Televiziyası 21 dekabr 2015-ci ildə, ARB telekanalı 5 aprel 2021-ci ildə, Speys TV isə 11 yanvar 2021-ci ildə HD yayıma keçib.

Qeyd edək ki, AzTV-nin sədri Rövşən Məmmədov ötən ilin dekabr ayında keçirilən illik onlayn mətbuat konfransı zamanı dövlət telekanalının yanvar ayının ilk ongünlüyündə HD yayıma keçəcəyini açıqlamışdı. MTRŞ-nın 28 dekabr 2017-ci ildə keçirilən iclası zamanı isə 1 yanvar 2018-ci il tarixdən AzTV və Mədəniyyət TV kanallarının Bakı şəhəri və Abşeron yarımadasında yüksək keyfiyyətli rəqəmsal (HD formatında) yayıma başlaması barədə qərar qəbul edilmişdi. (kult.az)