Ukrayna Prezidenti Volodimir Zelenski Rusiyanın Xerson və Zaporojye vilayətlərində qondarma müstəqillik referendumu keçirməyi planlaşdırdığını açıqlayıb.

ONN media xəbər verir ki, bəzi mənbələr isə Rusiyanın seçki bülletenlərini çap etməyə və vərəqələr paylamağa başladığını iddia edib. 

Zelenski vətəndaşlardan işğalçı əsgərlərə verdikləri məlumatlarla bağlı diqqətli olmalarını istəyib:

“İşğalçılara verəcəyiniz məlumatlarda çox diqqətli olmalısınız. “Rusiya qoşunları sizdən bəzi anketləri doldurmağı, pasport məlumatlarınızı təqdim etməyi xahiş etsələr, bilməlisiniz ki, bu sizə kömək etmək üçün deyil" - o deyib.

Ukrayna lideri əlavə edib ki, referendumla bağlı Moskvadan göstəriş gözlənilir.

Qeyd edək ki, martın əvvəlində Kiyev Moskvanın Xersonda referenduma hazırlaşdığı barədə xəbərdarlıq etmişdi. Ukrayna mənbələri iddia edir ki, rus qoşunları qondarma referendum üçün seçki bülletenləri çap edib və Rusiya təbliğatını ehtiva edən vərəqələr paylayıblar.

Xatırladaq ki, Rusiya 2014-cü ildə ilhaq etdiyi Krımda analoji referendum keçirib və və xalqın böyük əksəriyyəti Rusiya Federasiyasına qoşulmağa səs verib. Rusiyanın bölgəni ələ keçirməsindən sonra keçirilən bu səsvermə Ukrayna hökuməti və Qərb tərəfindən qeyri-qanuni olaraq pisləndi.