Güney Azərbaycanda gərgin vəziyyət davam edir.

Təbrizdə axşam saatlarında başlayan etiraz aksiyalarında etirazçılar hökumət əleyhinə şüarlarla yanaşı, türkcə milli şüarlar da səsləndiriblər.

"Biz ölməyə hazırıq, Babəkin sərbazıyıq", "Nə şahçıyam, nə şeyxçi, millətçiyəm, millətçi" və başqa bu kimi şüarlar səsləndirən narazılar aksiyalara müdaxilə edən xüsusi təyinatlı qüvvələrin zirehli maşınlarını daşa basıblar.

Sosial media fəallarının verdiyi məlumata görə, Təbrizin bir neçə yerində, Qonqabaşı, Şahnaz və Bazarağzı bölgələrində polis qüvvələri ilə əhali arasında qarşıdurma daha şiddətli olub.

Yayılan görüntülərdə Təbrizin bir neçə yerində yanğın baş verdiyi görünür.

Şəhərin mərkəzində polis bölmələrindən birinə məxsus konteyner ofisin yandırıldığı bildirilib.

Bununla yanaşı, şəhərin mərkəzində yerləşən "Barnavak" adlanan məhəllədə yanğınsöndürən maşının hökumət qüvvələri tərəfindən yandırıldığı qeyd olunub.

Fəallar hökumət məmurlarının təxribat törədərək etirazçılara qarşı repressiyaları əsaslandırmağa çalışdıqlarını yazırlar.