Azərbaycan nümayəndə heyəti Avropada Təhlükəsizlik və Əməkdaşlıq Təşkilatında (ATƏT) Xocalı soyqırımı ilə bağlı məsələ qaldıracaq. ONN media "Olaylar" -a istinadən xəbər verir ki, bu barədə Milli Məclisin deputatı, ATƏT Parlament Assambleyasında Azərbaycan nümayəndə heyətinin rəhbərinin müavini Tahir Mirkişili məlumat verib. Deputat bildirib ki, fevralın 22-də ATƏT regionunda həlli uzadılmış konfliktlərin müzakirəsi olacaq: "Bu məqsədlə xüsusi debat nəzərdə tutulub. Azərbaycan nümayəndə heyəti də bu debata aktiv qatılmağı planlaşdırır və konfliktlərin həlli üçün ədalətli mexanizmlərdən istifadənin vacibliyini irəli sürəcək. İkigərəfli görüşlərdə və çıxışlarda da Xocalı soyqırımı və münaqişə haqda yeni reallıqlarla b ağlı məlumatlandırma və ədalət tələbetmə xəttini davam etdirməyi düşünürük". Qeyd edək ki, Azərbaycan nümayəndə heyətinə Milli Məclisin deputatları Azay Quliyev, Tahir Mirkişili, Elşad Həsənov, Kamran Nəbizadə və Ülviyyə Ağayeva daxildirlər. Qurumun qış sessiyası çərçivəsində keçiriləcək komitə iclaslarında "Uzun sürən münaqişələrin həlli üçün ATƏT-in imkan və mexanizmləri", "ATƏT regionunda korrupsiya, pulların yuyulması və terrorizmin maliyyələşdirilməsi ilə mübarizə sahəsində effektiv idarəetmə", "Fövqəladə vəziyyətlərdə insan hüquqlarının qanuni məhdudlaşdırılmasının təsir sahələri" və digər mövzularda fikir  mübadiləsi aparılacaq.