Daşınmaz əmlakın icbari sığortası “İcbari sığortalar haqqında” Azərbaycan Respublikası Qanununun Xüsusi bölməsinin 2-ci fəslində nəzərdə tutulub. İcbari sığorta daşınmaz əmlakın yanğın və ya digər hadisələr nəticəsində zədələnməsi, məhv olması, yaxud hər hansı formada itkisi ilə bağlı dəyən zərərin əvəzinin ödənilməsi məqsədi ilə tətbiq edilir. Bəs daşınmaz əmlak sığorta olunmadıqda dəymiş zərərə görə kim məsuliyyət daşıyır? ONN media bildirir ki, mövzu ilə bağlı əmlak eksperti Nüsrət İbrahimov açıqlamasında deyib ki, daşınmaz əmlaklar mütləq sığortalanmalıdır. Hər hansı təbii fəlakət zamanı əmlak sığorta olunubsa, dəymiş zərər ödənilir. Əgər əmlak sığorta olunmayıbsa, məsuliyyət şəxsin özündədir. Əmlak sahibi öz mülkiyyətini işlədirsə, təbii ki, məsuliyyət özündədir. Ekspert qeyd edib ki, icarəyə götürən şəxlə icarəyə verən şəxs arasında müqavilə şərtlərində sığortanı kimin etdiyi və hər hansı təbii fəlakət zamanı məsuliyyəti kimin daşıdığı qeyd olunmalıdır. Müqavilə şərtlərinə uyğun olaraq da tərəflər məsuliyyət daşıyır. Vəkil Xəyal Bəşirov isə açıqlamasında deyib ki, daşınmaz əmlakla bağlı icbari sığorta yoxdursa, şəxs könüllü şəkildə öz əmlakını sığortalayıbsa, o zaman sığorta ödənişi alacaq. Əgər əmlakını sığortamayıbsa, hər hansı təbii fəlakət baş verərsə, dəymiş zərəri özü ödəməlidir. Vəkil bildirib ki, ölkədəki böyük ticarət mərkəzləri, qeyri-yaşayış obyektləri sahibləri bu işdə daha maraqlı olmalıdırlar. Onlar ayrı-ayrılıqda öz sahibləri ilə, mağazanı icarəyə götürən şəxslərlə müqavilə bağlayırlarsa, mütləq icarə müqaviləsinə daşınmaz əmlakın sığortası ilə yanaşı oradakı malların da sığortasını daxil etməlidirlər.