Yerli mediada 3 il əvvəl birinci qrup əlil Tural Əliyevin adına göndərilən əlil arabasının sabiq Əmək və əhalinin sosial müdafiəsi naziri Səlim Müslümovun müraciəti ilə buraxılmasına baxmayaraq, dünən Hava Nəqliyyatında Baş Gömrük İdarəsinin əməkdaşlarının Tural Əliyevə zəng edərək 2 il ərzində əlil arabasının gömrük pulunu ödəməsinə dair məlumat yayılıb.

Dövlət Gömrük Komitəsi isə yayılan xəbərlə əlaqədar rəsmi açıqlama yayıb. Komitənin Mətbuat və İctimaiyyətlə Əlaqələr İdarəsindən ONN media-ya verilən məlumata görə, xaricdən gətirilən əlil arabalarına görə ödəniləcək gömrük vergi və rüsumları ilə bağlı mövcud qanunvericilikdə hər hansı güzəşt nəzərdə tutulmayıb:

"Bir sıra kütləvi informasiya vasitələrində Azərbaycan Respublikası vətəndaşı, 1-ci qrup əlil Tural Əliyevdən 2016-cı ildə xaricdən sifariş etdiyi əlil arabasına görə gömrük orqanları tərəfindən 3 il sonra gömrük rüsumlarının tələb olunması barədə məlumat yayılıb. Dövlət Gömrük Komitəsi bildirir ki, xaricdən gətirilən əlil arabalarına görə ödəniləcək gömrük vergi və rüsumları ilə bağlı mövcud qanunvericilikdə hər hansı güzəşt nəzərdə tutulmayıb. Tural Əliyevin 2016-cı ildə gətirdiyi əlil arabası isə istisnai hal kimi gömrük rüsumu alınmadan rəsmiləşdirilib. Son dövrlərdə gömrük sahəsində maliyyə-vergi intizamının daha da gücləndirilməsi istiqamətində həyata keçirilən tədbirlər çərçivəsində gömrük vergi və rüsumlarını ödəməyən şəxs və qurumlara yenidən müraciətlər olunur. Belə müraciətlərdən biri də Tural Əliyevə edilib".

Dövlət Gömrük Komitəsi bildirir ki, bu istiqamətdə hər hansı qanun pozuntusuna yol verilməyib. Belə ki, Gömrük Məcəlləsinin 249.1-ci maddəsinə əsasən, ödənilməmiş gömrük borcları gömrük ödənişlərini ödəmək öhdəliyinin yarandığı tarixdən 3 (üç) il ərzində gömrük orqanları tərəfindən bu maddədə müəyyən edilmiş qaydada məcburi tutulur.

Konkret Tural Əliyevin gətirdiyi əlil arabası ilə bağlı fakt üzrə isə sənədləşmə yenidən nəzərdən keçirilib və məsələ Dövlət Gömrük Komitəsi rəhbərliyinin xüsusi tapşırığı ilə artıq birdəfəlik müsbət həllini tapıb.