Baş vermiş hər hansısa fövqəladə hadisə Fövqəladə Hallar Nazirliyinin faydalı iş əmsalını nə artırır, nə də azaldır. ONN media xəbər verir ki, bu sözləri Axar.az-a Fövqəladə Hallar Nazirliyinin mətbuat katibi Yəhya Babanlı “Diqlas” Ticarət Mərkəzində baş verən yanğından sonra ticarət obyektlərində yoxlamaların gücləndiriləcəyi barədə yayılan məlumatı şərh edərkən deyib. Y.Babanlı bildirib ki, nazirlik belə obyektlərdə vaxtaşırı yoxlamalar keçirir və təlimat verir: “Fövqəladə Hallar Nazirliyi yoxlamaları gündəlik keçirmir. Nazirlik yoxlamanı nəzərdə tutulan qaydada və intervalda keçirir və təlimat verir. Önəmli olan odur ki, həmin məkanda, obyektdə verilən təlimata düzgün riayət edilsin. Yoxlamanın aparılması əsas deyil. Əsas odur ki, yoxlamadan sonra təlimata riayət olunsun. Nazirlik hər obyektə, məkana bir nümayəndə təyin edə bilməz ki, orada baş verən nöqsanlarla bağlı gündəlik məlumat versin. Obyektlər özləri nazirliyin verdiyi təlimatlara riayət etməkdə maraqlı olmalıdır ki, hansısa fövqəladə hadisə zamanı ağır fəsad yaranmasın”.