Ermənistanın sabiq baş naziri Serj Sərkisyanın lideri olduğu Respublika Partiyası baş nazir postuna namizəd irəli sürməyəcək.
ONN media xəbər verir ki, bu barədə məlumatı partiyanın mətbuat katibi Eduard Şarmazanov deyib. Bu gün Sərkisyanla baş nazirin səlahiyyətlərini icra edən Karen Karapetyan arasında görüş keçirildiyini bildirən mətbuat katibi görüşdə daxili siyasi vəziyyət və baş nazir seçkiləri ilə bağlı məsələlərin müzakirə olunduğunu bildirib:

“Görüş zamanı Partiyamızın baş nazir postuna namizəd irəli sürməməsi barədə qərar verilib. Biz mayın 1-də parlamentdə səsvermə keçirilənə qədər irəli sürüləcək bütün namizədlərlə bağlı müzakirə aparacağıq. Aprelin 30-u axşam saat 06.00-a qədər vaxtımız var. Partiya yalnız dövlət maraqlarından çıxış edəcək. Hazırda Nikol Paşinyandan başqa baş nazir postuna namizədlərin olub-olmadığını bilmirik ”.