Rostovdakı azərbaycanlıların “QARA GÜNLƏRİ” başlayır – Qayıdış GÖZLƏNTİSİ

17-02-2026, 17:28

Rusiyanın Rostov vilayətindəki miqrantlara 2026-cı il aprelin 1-dən dekabrın 31-dək kuryer fəaliyyəti, eləcə də qida, içki və tütün məhsullarının topdan və ya pərakəndə satışı ilə məşğul olmaq qadağan ediləcək. Vilayət qubernatorunun 11 fevralda verdiyi fərmana əsasən, onlara quru və boru kəməri nəqliyyatında, eləcə də poçt xidmətlərində iştirakına məhdudiyyət tətbiq ediləcək.

Martın 1-dən etibarən həmçinin miqrantlara qiymətli metalların satışı və fitnes mərkəzlərinin fəaliyyətində iştirak etmək də qadağan edilir. Vəkil Svetlana Leusovanın sözlərinə görə, qadağa yalnız iş icazəsi (patent) ilə işləyən miqrantlara şamil ediləcək.

Bəs bu qərarlar Rostov vilayətində yaşayan minlərlə azərbaycanlıların yaşayışına ciddi mənfi təsir göstərəcəkmi? Eyni zamanda bu məhdudiyyətlərin tətbiqi azərbaycanlı miqrantların Rusiyadan geriyə öz vətənlərinə qayıtmasına gətirib çıxara bilərmi?

Hüquqşünas Xəyal Bəşirov Musavat.com-a bildirib ki, son illərdə Rusiyanın bir sıra regionlarında miqrasiya siyasəti sərtləşdirilir:

“Rostov vilayəti isə Ukrayna müharibəsi fonunda strateji bölgə sayılır və təhlükəsizlik arqumenti ilə əmək bazarına nəzarət artırılır. Rostov vilayətində miqrantlara qarşı tətbiq ediləcək yeni məhdudiyyətlər praktik olaraq əmək bazarının ən çox miqrantların çalışdığı seqmentlərini hədəfləyir. Bu baxımdan qərarın azərbaycanlılara təsiri real və hissolunan ola bilər”.

Hüquqşünas qeyd edib ki, Rostov vilayətində yaşayan azərbaycanlıların əhəmiyyətli hissəsi ərzaq, içki, bazar sektorunda pərakəndə və topdansatış ticarətdə, logistika və kuryer xidmətlərində, kiçik sahibkarlıq, xidmət sahələrində fəaliyyət göstərir:

“Haqqında söhbət gedən qərar isə xüsusilə ticarət və logistika sektoruna zərbə vuracaq. Bu isə gəlir itkisi və işsizliyin artması ilə nəticələnə bilər. Əgər nəzarət sərt və total tətbiq olunarsa, xüsusilə kiçik biznes sahibləri və bazar ticarəti ilə məşğul olanlar üçün ciddi sosial-iqtisadi çətinliklər yarana bilər”.

Hüquqşünas hesab edir ki, kütləvi qayıdış ehtimalı zəifdir:

“Amma gəlirini tam itirən ailələr, hüquqi statusu zəif olan əmək miqrantları, alternativ iş tapa bilməyənlər öz vətənlərinə qayıtmaq barədə düşünə bilərlər. Lakin nəzərə almaq lazımdır ki, Rusiyada formalaşmış biznes şəbəkələri, ailə bağları, uzunmüddətli yaşayış icazələri miqrantların bir hissəsini qalmağa və uyğunlaşmağa sövq edə bilər”.

ONN İnformasiya Agentliyi