Brüsselin beynəlxalq aeroportunda yükdaşıyanların altı günlük tətili 950 reysin ləğv edilməsinə səbəb olub.

ONN media xarici KİV-lərə istinadla xəbər verir ki, oktyabrın 25-dən 31-dək davam edən tətil ümumilikdə 115 min sərnişinə təsir edib. Nəticədə “Aviapartner” hendlinq kompaniyası əmək şəraitinin yaxşılaşdırılması və maaşların artırılması ilə bağlı tələbləri yerinə yetirmək barədə öhdəlik götürüb.

Sərnişin və yük təyyarələrinə yerüstü xidmət göstərən “Aviapartner” kompaniyası baqajların yüklənməsi və boşaldılması ilə məşğuldur. Şirkət hər gün yerinə yetirilən reyslərin 30 faizinə xidmət göstərir. “Easyjet” və “Ryanair” loukosterləri, həmçinin “British Airways”, “Air Baltic”, “Iberia”, KLM, “Qatar Airways” və SAS daxil olmaqla 20-yə yaxın aviaşirkət “Aviapartner” kompaniyasının müştərisidir.