Dünyada kitab oxuma vərdişləri ilə bağlı yeni statistika açıqlanıb. 2024-cü il üzrə hesablamalar insanların il ərzində kitablara ayırdığı vaxt və oxuduğu kitab sayına əsaslanır.
ONN media xəbər verir ki, siyahının lideri ABŞ olub. Məlumata görə, amerikalılar il ərzində orta hesabla 357 saat kitab oxuyur. Bu göstərici onların ildə təxminən 17 kitab oxuduğunu göstərir.
İkinci yerdə Hindistan qərarlaşıb. Bu ölkədə vətəndaşlar kitab oxumağa ildə təxminən 352 saat vaxt ayırır, bu da 16 kitaba bərabər hesablanır.
İlk beşlikdə həmçinin Böyük Britaniya, Fransa və İtaliya yer alıb. Bu ölkələrdə oxu müddəti müvafiq olaraq 343, 305 və 278 saat olaraq qeydə alınıb.
Digər yüksək göstəricili ölkələr arasında Kanada, Rusiya, Avstraliya, İspaniya, Hollandiya və İsveçrə də var.
Araşdırma ən aşağı oxu göstəricilərinin Əfqanıstanda qeydə alındığını göstərib. Bu ölkədə bir nəfər il ərzində cəmi 3 kitab oxuyur.
Statistikaya əsasən, rəqəmsal medianın sürətlə inkişafına baxmayaraq, bir çox ölkələrdə kitab oxuma mədəniyyəti güclü olaraq qalmaqdadır.