HAZARFEM Dərnəyinin Sədri Nuran ACAR-ın ONN media-ya verdiyi məlumata əsasən xəbər veririk ki, İstanbulda Sovet ordusunun 20 yanvar 1990-cı ildə Bakıda qətlə yetirdiyi və tarixə "Qanlı yanvar" olaraq yazılan 20 yanvar şəhidləri yad edildi.

İstanbul Universitetində Xəzər Folklor Təhsil Araşdırma Mərkəzi HAZARFEM ilə İstanbul Universiteti Azərbaycan Mədəniyyət və Dayanışma Cəmiyyətinin təşkilatçılığı ilə "Qanla yazılan azadlıq: 20 yanvar Bakı Qətliamı" mövzusunda konfrans keçirildi.

İstanbul Universiteti Rabitə Fakültəsinin konfrans salonunda reallaşan tədbirdə Azərbaycan İstanbul Başkonsolosluğu təmsilçiləri, elm adamları, sənətçilər, Yozqat Federasiyası idarəediciləri və tələbələr iştirak etdi.

Hər iki qardaş ölkənin şəhidlərinin xatirəsi bir dəqiqəlik sükutla yad edildi və İstiqlal Marşı və Azərbaycanın Milli Himni səsləndirildi.

Ardından qanlı yanvar hadisələrini anladan qısa video göstərildi.

HAZARFEM Dərnəyi sədri Nuran Acar 20 yanvar Azərbaycan Milli Mübarizəsinin və şəhidlərinin əziz xatirəsinin Türk xalqının həmişə daim qəlbində yaşayacağını qeyd etdi.

İstanbul Universiteti Azərbaycan Mədəniyyət və Dayanışma Cəmiyyətinin qurucu rəhbəri Rəşid Mustafazadə 20 yanvar faciəsinin Azərbaycan üçün kədərli zaman olduğunu, eyni zamanda həqiqi qəhrəmanlıq dastanı olaraq tarixdə yer aldığını qeyd etdi.

Dünya Azərbaycanlıları Koordinasiya Şurası üzvü, Prof.Dr.Aygün Attarın məsələ ilə bağlı çıxışı dinlənildi. A.Attar 20 yanvar faciəsinin səbəbləri və nəticələri haqqında ətraflı məlumat verdi və 20 yanvar hadisələrinin Azərbaycanın müstəqilliyində həqiqi bir dönüş nöqtəsi rolunu oynadığını bildirdi. Tədbir zamanı Prof. Aygün Attarın Erməni vəhşiliyini üzə çıxaran və Ermənilərin qətlə yetirdiyi körpə Zəhraya istinad etdiyi "Bir Modernite Sorunu Olarak Ermenicilik" kitabı tədbir iştirakçılarına təqdim edildi və tədbir iştirakçılarından böyük maraq gördü.

Çıxışı və dediyi tarixi həqiqətlər böyük maraqla dinlənilən Prof.A.Attar, tədbir sonunda konfrans iştirakçılarının suallarını cavablandırdı və hər iki ölkənin ortaq problemi olan Erməni məsələsində xüsusən də gənclərimizin məlumatlı və sayıq olmalı olduğunu diqqətə çatdırdı.