Fevralın 25-də Xocalı soyqırımının 27-ci ildönümü ilə əlaqədar Heydər Əliyev Sarayında anım mərasimi keçirilib. Saraydan ONN media -ya bildirilib ki, əvvəlcə tədbir iştirakçıları XX əsrin ən dəhşətli və qanlı faciələrində biri olan Xocalı soyqırımı ilə bağlı təşkil edilmiş kitab stendinə baxış keçiriblər. Faciə qurbanlarının xatirəsi bir dəqiqəlik sükutla yad edildikdən sonra Heydər Əliyev Sarayının direktoru, Əməkdar mədəniyyət işçisi Fərhad Babayev Xocalı soyqırımının Azərbaycan tarixinin ən dəhşətli və faciəli səhifələrindən biri olduğunu qeyd edib. O, Heydər Əliyev Fondunun ermənilərin azərbaycanlılara qarşı həyata keçirdiyi Xocalı soyqırımının dünya ictimaiyyətinin diqqətinə çatdırılması və tanıdılması istiqamətində müxtəlif ölkələrdə tədbirlər, aksiyalar keçirməsindən, çap olunan kitablar, jurnallar, posterlər və çəkilən sənədli filmlər, habelə sənədli dəlillər və fotoşəkillərin təqdim edilməsindən ətraflı məlumat verib. Tədbirdə çıxış edənlər Xocalı faciəsinin Azərbaycan tarixində unudulmaz, dəhşətli və qanlı hadisələrdən biri olmasından, Ermənistan silahlı qüvvələri tərəfindən bir gecədə 613 dinc sakinin amansızcasına qətlə yetirilməsindən, minlərlə günahsız azərbaycanlının əsir götürülməsindən, ölkəmizə və xalqımıza qarşı yürüdülən işğalçılıq və etnik təmizləmə siyasətindən, onun ağır nəticələrindən danışıblar. Sonda Xocalı soyqırımının dəhşətlərini əks etdirən “Xocalı - əsrin faciəsi” adlı sənədli film nümayiş olunub.